2Ch 5 | ZomZIV | STEP | Solomon in TOPA biakinnpi-a sep ding khempeuh a zawh khit ciangin a pa David in a apsa nate - ngun le kham le vanzatte khempeuh - le Pasian biakinnpi sunga a koih gou khempeuh a sungah a tum hi.

2 Chronicles 5

1 Solomon in TOPA biakinnpi-a sep ding khempeuh a zawh khit ciangin a pa David in a apsa nate - ngun le kham le vanzatte khempeuh - le Pasian biakinnpi sunga a koih gou khempeuh a sungah a tum hi. ^a

Biakinnpi ah Singkuangpi Kipua

2 Tua ciangin Solomon in David Khuapi Zion pan TOPA thukhun singkuangpi puato dingin Israel upate, beh a lutangte khempeuh le Israel-te innkuan ukpi-te Jerusalem ah a kikhawmsak hi. 3 Tua hi-a a kha sagihna sung pawikham hunin Israel mi khempeuh kumpipa kiangah a kikhawm uh hi.

4 Israel upate khempeuh a tun khit uh ciangin Levi-te in singkuangpi lakhia uh a, 5 singkuangpi le Kikhopna Puan-buk le a sunga vanzat siangtho khempeuh a puato uh hi. Levi siampite in tuate puato uh a; 6 Kumpi Solomon le ama kianga kikhawm mipi khempeuh in singkuangpi mai-ah tuu le bawngtal tam pia lua uh ahi manin kiciamteh zo loin zong a kisim zo kei hi.

7 Tua ciangin siampite in TOPA thukhun singkuang a om nading mun biakinnpi sunga inndei sungnung a Mun Siangtho Pen ah pua uh a, cherub-te khanuai sanah a koih uh hi. 8 Cherub-te in singkuangpi omna mun tungah a khate uh zak uh a, singkuangpi le a zawnna zawl a khuh hi. 9 Hih zawlte saulua-in biakbuk sungnung mai panin a mongte kimu thei a, ahi hangin Mun Siangtho panin a kimu thei kei hi; tua hi-a tua lai-ah tuni dong a om lai hi. 10 Egypt pan Israel-te a paikhiat nungun TOPA in amaute tawh thukhun a bawlna mun Horeb a Moses in a koih suangpek nih longal singkuangpi sungah adang bangmah a om kei hi. ^b

11 Tua ciangin Mun Siangtho panin siampite a paikhia uh hi. Tua lai-a om siampite khempeuh kua pawl cih om loin amau le amau a ki-ap ciat uh hi. 12 Tumtheih tum Levi-te khempeuh - Asaph, Heman, Jeduthun le amaute tapate le a tanaute uh - biakna-tau nisuahna lam pangah dingin, saihadial puan hoih silh uh a, daltuahte, harp-te le lyre-te a tum uh hi. Amaute pengkul mut siampi 120 tawh a kithuah uh hi. 13 Lasate le pengkul mutte aw khata gingin TOPA tungah lungdam ko ding le a phat dingin a kigawm uh hi. Pengkulte, daltuahte le a dang tumtheihte kipawlkhawm uh a, a aw uh sangsakin: ^c

“Amah hoih hi;
ama itna kip tawntung hi,” ci-in TOPA phatna a sa uh hi.

Tua ciangin TOPA biakinnpi meii tawh kidim a, 14 Pasian biakinnpi TOPA minthanna tawh kidim ahi manin siampite in a biakna nasep uh a sem thei kei uh hi. ^d